ڈاکٹرا مجد ثاقب اس مملکت خداداد کے ایک ایسے سپوت ہیں جنھوں نے قوم کے اس درد کو دل سے محسوس کیا اور ’’اخوت‘‘ کی شکل میں عملی طورپر قدم بڑھایا۔

ڈاکٹر امجد ثاقب نے ایک خیال کو سرکارؐ کی حیات سے تھاما اور تھامے رکھا تو ایک چمن کھل اٹھا۔ ہر گزرتے دن کے ساتھ فروغ پذیر۔

ڈاکٹر امجد ثاقب جیسے دردِ دل رکھنے والوں کے چہروں پر نظر ڈالتا ہوں تو مجھے وہاں نور کی جھلک دکھائی دیتی ہے۔

ڈاکٹر امجد ثاقب غریب نہیں لیکن غریبوں سے پیار کرتا ہے۔

ڈاکٹر امجد ثاقب ان لوگوں میںسے ہے جو ایسے معاشرے کی تعمیر کا خواب زندہ رکھے ہوئے ہے اور اس کی تعبیر غریبوں میں بانٹنا چاہتا ہے۔

ڈاکٹر امجد ثاقب آب ِ زم زم کی طرح اُجلے اور آئینے کی طرح شفاف انسان ہیں۔

بعض لوگ طبعاً معمار ہوتے ہیں اور یک سوئی کے ساتھ تعمیرِ مسلسل کو اپنا اسلوبِ زندگی بنانے پر قادر ہوتے ہیں۔اسے ایک طرزِ زیست بنا کر جی سکتے ہیں۔ بابا امجد ثاقب مجھے اسی زمرئہ معماران میں شامل لگتے ہیں۔

ڈاکٹر امجد ثاقب عملی طور پر حرص‘ لالچ اور طمع کی جگہ ایثار اور قربانی کا جذبہ لے کر غربت کے خاتمہ کی جدوجہد کا حصہ ہیں۔

ڈاکٹر امجد ثاقب آدمی نہیں ایک معجزہ ہے ۔ ان سے ملیں تو آپ محسوس کریں گے کہ ان کے وجود کے گرد نور کا ایک ہالہ ہے۔

ڈاکٹر امجد ثاقب صاحب کے لفظوں میں اللہ تعالیٰ نے سچائی کی تاثیر رکھ دی ہے جو مجھے بڑے بڑے ادیبوں کے ہاں بھی دکھائی نہیں دی۔

ڈاکٹر امجد ثاقب کا ذہن ایک ترشا ہوا ہیرا ہے۔ ایک مستندطبیب‘ ممتاز منتظم ‘ اللہ اوررسول ؐ کی محبت میں ڈوبا ہوا مسلمان۔

امجدثاقب لوگوں کی مدد کرتا ہے مگر اسے امداد خیرات اور بھیک کے تاثر سے بچانا چاہتا ہے۔ وہ کہتا ہے کہ لوگ مجھ سے قرض لے جائیں ۔ مجھے واپس کردیں مگر اس سے اپنی زندگی کو واقعی زندگی بنائیں۔ اسے قرض واپس مل جاتا ہے اور لوگوں کو زندگی کی اصل کیفیت کا ہنر بھی مل جاتا ہے۔امجد ثاقب کا کریڈٹ ہے کہ اس نے قرض کو نیکی بنا دیا ہے اور قرضہ لینے والوں میں یہ جذبہ بھر دیا ہے کہ وہ اس نیکی کو پھیلاتے رہیں۔

ڈاکٹر امجد ثاقب نے بارہ سال میں عملی طور پر یہ ثابت کردیا ہے کہ اگر حکومت ‘ مخیر حضرات اور بین الاقوامی ادارے چاہیں تو اخوت کے ماڈل پر عمل کرکے بتدریج غربت میں کمی لاسکتے ہیں۔

جب تک ہمارے درمیان امجد ثاقب جیسے افراد موجود ہیں ہم اپنا سر اٹھا کر جی سکتے ہیں ‘ تب تک ہم دنیا کی سب سے بری قوم نہیں۔

جب تک اخوت جیسے ادارے قائم ہیں اور امجد ثاقب جیسے لوگ برسرعمل ہیں ‘ یہ اس بات کا اعلان ہے کہ خدا اس ملک کے مستقبل سے مایوس نہیں ہوا۔

ڈاکٹر امجدثاقب ایک لازوال کردار اور بامقصد خدمتِ خلق کا جذبہ رکھنے والوں کے لیے ایک رول ماڈل ہیں۔

کتنے اعزاز کی بات ہے کہ اللہ تعالیٰ نے اپنی مخلوق میں اپنا فضل بانٹنے کے لیے ڈاکٹر امجد ثاقب کو منتخب کیا۔

ایک کہکشاں ہے جو ڈاکٹر امجد ثاقب نے روشن کردی ہے۔ ایک نور کا ہالہ ہے جس نے زمان و مکان کو اپنی لپیٹ میں لے لیا ہے۔ ایک امید ہے جو روشنی کا مینار بن کر افق تا افق پھیل گئی ہے۔

ڈاکٹرا مجد ثاقب صوفی نہیں لیکن اس نے صوفیوں والا کام کرڈالا ۔ اخوت کی جانب نظر اٹھا کردیکھے ‘ آنکھیں خیرہ ہو جائیں گی۔

ڈاکٹر محمد امجد ثاقب ایک خیال کا نام ہے۔ خیال ڈھل کر نیا بنا اور اس کا نام قدرت نے ازل سے ہی ’’اخوت ‘‘ رکھ دیا تھا۔ ڈاکٹر امجد ثاقب کی ذات کا اصل اب اخوت ہے ۔ یہ اخوت مواخات سے ہے اور امجد ثاقب کو اس کیفیت سے محبت ہے۔

 امجد ثاقب صرف خواب نہیں دیکھتا ان کی تعبیر تک پہنچنے کا فن بھی جانتا ہے۔ڈاکٹر امجد ثاقب نے اپنی سانسیں دوسروں کے لیے وقف کرکے ایک ایسے سسٹم کو آکسیجن فراہم کی ہے جس کے تحت انسانوں میں اپنی مدد آپ کا جذبہ ایک بار پھر سے جیتا جاگتا ہوا محسوس ہونے لگا ہے۔

ڈاکٹر امجد ثاقب نے صرف خلوص نیت اور جہدِ مسلسل سے غریبوں کو بلا ضمانت اور بلاسود قرضے دینے اور اس سلسلہ کو  کام یابی سے چلانے کا معجزہ کردکھایا ہے۔

 ڈاکٹر امجد ثاقب نے مسجدوں کی چٹائیوں پر بیٹھ کر دوسروں کے لیے عملی طور پر کچھ کر گزرنے کا چارہ کیا۔وہ بیمار‘ بے بس‘ لاچار ‘ دکھی انسانیت اور معاشرے کے کچلے افراد کی دستگیری کے لیے ان کی عزت نفس مجروح کیے بغیر انھیں سہارا دیتے ہیں تاکہ وہ بھی زندگی کی دوڑ میں باعزت طور پر شریک ہوسکیں۔

اپنی طرز کی معاشیات کی دنیا میں بہت بڑا نام بلکہ سب سے بڑا نام پاکستان کے امجد ثاقب کا ہے۔

اس روشنی جس کا نام محترم ڈاکٹر امجد ثاقب ہے…جو گرچہ اپنی ذات میں انجمن ہیں…مگر مجھے بنے بنائے صوفی لگتے ہیں۔صوفی…خدا کا دوست… ڈاکٹر امجد ہی ہیجڑے کے میلے پائوں گود میں رکھ کر اس کے زخم دھو سکتا ہے اور وہی ان میلے کچیلے راندئہ درگاہ لوگوں کی مجلس میں بیٹھ کر انھیں عزت دے سکتا ہے۔

اس مارا ماری اور نفسانفسی کے عالم میں معاشرے میں زندہ رہنے کی ابھی کوئی رمق موجود ہے تو اس کا کریڈٹ ڈاکٹر امجد ثاقب جیسے سر پھروں کو جاتا ہے۔ڈاکٹر امجد ثاقب کی تنظیم اخوت آنے والی نسلوں کے سر پر سایہ فگن ہے‘ انسانیت کی آخری نہیں بلکہ پہلی امید ہے۔

عظمت اپنے ساتھ خوابِ عظمت لاتی ہے۔ کیسے کیسے حبِ جاہ کے طوفان میں بہہ گئے لیکن ایثار میں انکسار جب بس جائے تو سچی محبت کا وہ بیج پھوٹتا ہے ‘ تہہ در تہہ گلشن جس سے استوار ہوتے چلے جاتے ہیں۔ ابلیس سے پروردگار نے کہا تھا : میرے مخلص بندے کبھی گمراہ نہیں ہوں گے۔ اپنے کسی ہم عصر کی پروفیسر احمد رفیق اختر نے کم ایسی تعریف کی ہوگی ‘ جنتی ڈاکٹر امجد ثاقب صاحب کی۔ فرمایا: ایسا کارنامہ انہوں نے انجام دیا ہے کہ کم از کم مجھ ایسے کسی آدمی کے بس میں نہ تھا۔ حالانکہ خود ایسے سخی ہیں کہ لاکھوں پہ سایہ کیا۔

ڈاکٹر امجد ثاقب سے باتیں کرتے ہوئے مجھے علامہ اقبال ؒ کا یہ شعر بار بار یاد آیا کہ

عقابی روح جب بیدار ہوتی ہے جوانوں میں

نظر آتی ہے ان کو اپنی منزل آسمانوں میں

تب سے اب تک ’’اخوت ‘‘ خواب سے حقیقت بننے کے ساتھ ساتھ قرضِ حسن کے حوالے سے دنیا کا سب سے بڑا اور معتبر ادارہ بن چکی ہے اور بیس برس قبل دو لاکھ روپے کے چند قرضوں اور بغیر کسی دفتر یا عملے کے چلنے والی اخوت اب  تک ستاون لاکھ خاندانوں اور اڑھائی کروڑ غریب اور کم وسیلہ لوگوں کے شانہ بشانہ کھڑی ہے۔

ڈاکٹرامجد ثاقب وہ قد آور سایہ ہے جس نے مجسم ہو کر اخوت کا روپ دھارا ہے۔اس درویش صفت انسان نے زندگی سے بڑے مقصد کو اپنی ذات کا حصہ بنا رکھا ہے جو ہمیشہ قائم رہنے والاہے۔رمضان المبارک میں اخوت کو یاد رکھئے جس کا منشا صرف فلاحِ انسانی ہے۔